Clicar (aceder artigo no Liberal)
EDUCAÇÃO RECORDAÇÕES
EDUCAÇON E BRINCADERA DE MNIN D’ESCOLA DE CARTILHA TE ESCOLA DE REI (ONES 1945/1950)Esse Storia, na tude sê extenson e dimenson, é um grande homenaja pa tude aquês que na épca fui nôs professor de Cartilha, Fantilona, Fantilim, Tercera té Quarta-Classe, sem contá c’aquel Admisson, que naquel tempe n’era nem más nem menos q’um quarta-classe repetide e reforçode pa mnin pudess entraba más bem preparode na Liceu. Nome de tude esse pessoal que desburrá, insená e isdá nôs dá quês primer posse na vida de prendê a lê, pa no podia vançá e abri oie pa Munde, tita bem parcê que tude honra na contar de más esse storia de nôs terra. Sobretude, só pa no ca esquecê nunca importança quês gente tive na nôs formaçon e escola de vida. Pôs esse fui sempre quel Pedra Mestra que guentá tude um parede naquel tempe, que insená n’era cosa fácil. Quonde nôs era mnine, qu’inda no ca tava intendê drete nôs nome e que nôs priucupaçon ma grande era só cmé e brincá, tude cosa tava parcê nôs bnitim, scantchim, sabim de munde, naquel inconsciença despreocupode de vida, prope de mnin que nôs era e que ca tava dexône tmá fé de cosa série de vida. Nô ca era exigente, no tava contentá sempre c’aquel poque que nôs pai ma nôs mãe tava done. Despôs, cma idade tava bem t’entrá na corpe, também tava tchegá quel tempe que, na tude casa, mãe ta tinha preocupaçon de cumeçá d’insená o mandá insená sês mnin prendê a lê, mez antes de ba pa escola. Chatice é que tude pessoal de casa tava tmá quel cosa mute a série e tava tmá nôs conta de lâmpeda no dure, desde irmon más bedje, prima, primo e mãe, té tchegá na pai, cosa qu’era más escosse, quê pai ca tinha mute tempe pa mode traboi. Nesse parte de nôs vida, cosa tava vrá logue diferente quê mnin já ca tinha quel facilidade de brincadera. Só tava ba brincá despôs de prendê liçon. Quonde já bo tava más desburrode, ês tava mandobe pa escola que bo Cartilha (livre pa prendê letra, ma monossílaba té trissílaba), bo pidrinha de conta, um latinha baziu de cigorre capstan ondê que bo tava pô bo lapse, bo pedra d’escrevê na pedra de conta, um canitinha de ponta pa moiá na tinter e um cadirnim de linha estrete pa prendê fazê letra. Tude mnin tava gostá de dá pa esperte, anton gente tava cumeçá pa cartilha abcedar: abcdefghij… Ês tava mandone abri nôs cartilha lá logue, no tava rancá ta lê p’uvide cantadim: abcdefghijklmnopqrstuvwxyz ta corrê! Tude cool, tude nice, ma na realidade no ca sabia lê nem flaça. Anton, tinha quês escola ma quês professor que fecá gravode na mimória e na coraçon de nôs tude, pa tude tempe, ondê que tonte geraçon fui desburrode e que no ca podê nunca esquecê, quê nôs pai passá pra lá também, de manera que seriedade sempre sigui de geraçon pa geraçon, de pai pa fidje, na ruspeite pa tude quês antigue professor ma professora. Pa lembrança, tinha escòla de Dona Cidália, na rua de Serra, ondê que bo tava tchegá que bo banquim de madera marcode bo nome, que tava fecá lá na escola pra sempre. Quê assim, quonde bo tava mudá de classe, quel banquim tava servi pa quês mnin que tava bem despôs e que ca tava podê trazê bonque. Na escola, naquês primer dia, era um batucada de matá. Cuitada de Dona Cidália, já bidjinha. mei surda, ca tava nem dá fé daquel gritaiada de más de trinta mnin, tude juntim em core ta lê alfabete siguide (abcdefghijk...), gritode durante tude quel dia até hora o d’interval o de ba pa casa. Moda quel escola lá, tinha uns data na Soncente naquel tempe: Escola de Nha Laloia Pite e Figue, na rua de Murguine, ondê que pa Natal el tava dá tude mnin de sê escola um pitim e três figue que tava fazê ligria na coraçon de tude quês inocente… Também tinha quês Escola ondê que cosa era ote, moda escola de Sr. Orlande, Ti Tiofe, irmon de Ti Tchutche de Noba, Sr.Grigol, Sr. Tej, Dona Maria Amelia e más e más que ca tita beme na mimória grinha sim! Ês Escola fui nôs primer contacte que vida de prendê a lê, concentrá e educá pa gente prendeba estode quete, pa flecidade de nôs mãe, pês pudesse incontrá quel sussegue d’espirte, sobretude lá naquês casa ondê que tinha tcheu mnine. Pa nôs também, na principe tude era prope sabim, quê no tava lê tude letra curride sem gaguejá, quê no ta tinha el tude decorode na mimória, pa força d’uvi tude quês otes mnin reptil. No tava lê rapte, só pa no podia sei pa interval, pa ba comprá quês pirinha das Ilha num cartuche de papel (dez pa toston) de nha Candinha, mãe de Pinúria, ptode quês espirte (essência de fruta) quel tava comprá lá na Drogaria de nôs Djandjan. Ma cosa tava vrá prope dure despôs d’interval, quonde professora tava pô nôs na sê joei, c’aquel Cartilhinha na mon, tude bajufim, cum papilim frode um braquim pa no dzeba letra por letra, em vez de lê curride, moda no tava fazê pa glantaria. El tava fintá nôs tude bnitim. Sê táteca era perguntá nôs se no sabia lê. Nôs, pa glantaria, no tava dzel logue cma sim! Lá el ta dzebe: «anton alê, dexôme oiá». Anton no tava rancá ta lê moda um corre sem travon: abcdefghijklmnopqrstuvxz… Professora tava dzene: «ah, bo esquecê de w» (dabeliú, moda ês tava insená nôs lel na Escola)! El tava apoiobe cum «mute bem, nha mnin»… Lá el tava frá quel puntinha de papel um braquim, el tava pol derriba dum letra qualquer de nôs Cartilha, el tava dzene cma «já bo sabê lê, dzeme que letra é esse»? Dá no tava tapá e tude bajofaria tava cabá. Anton, quel martírie tava cumeçá… El tava torná passá quel papilim c’aquel braquim siguide, um trás d’ote… abcd…etc. Cumeçá, torná dá, torná cumeçá, té no metel na cabeça! Despôs, quonde no tava conchê nôs letra, no tava passá dum pa dôs. Dissilábica moda: d+a = da, d+e = de, etc… Despôs trissilábica moda: c l a = cla, c l e = cle, etc… Té no prendê fazê palavra. Lá, anton, quem já sabia tava insená quês ma piqnim que tava tchegá de nove na Escola. Nova vida, vida nova, quê nôs más bedje no tava passá pa Fantilona, um livrona qu’era só dissilábica ma trissilábica e c’alguns palavra pa no completaba na fim! Despôs era Fantilim, um livrim más piqnim, más lorgue, chei de palavra ma figura pa no prendreba soletrá, pa fazê frase de palavra cumposte. Nôs evoluçon d’escola, de passá de Fantilona pa Fantilim, era um període crítique e terrível de nôs vida. Cma já no sabia lê um gzinha, professora tava dexône desinrascá. Anton, ote problema tava cumeçá quê nôs era tcheu e no sabia soletrá ma, pa facilitá vida, gente tava soletrá ma tava lê pa figura, o que tava dá: - D+A=DA, D+O=DO e palavra era DADO ma nôs, pa figura, no tava alê Dupatrão; V+E=VE, A=A, D+O=DO e palavra era VEADO... no tava Ês tava mandá tude gente pará e intchá gente de pau pa cabá c’aquel paródia. Tinha sempre uns que tava levá cada pascoçada, quê professora tava dzê cma era p’abuse! O que na realidade era dvera, quê tinha sempre quês mnin más traquine e mi era um dês. O certe é que no ba ta passá de classe e ta criá e, moda pove ta dzê, quonte ma grande más problema, ma cada cosa na sê épca. Lá no mudá de ritme, quê no passá pa Escola de Rei, ondê que no fazê primera, sigunda e tercera classe ma Senhor Carvalho, professor. Na Escola de Rei, cosa tava vrá diferente pa tude gente, rapazim ma mnininha, quê nôs era ubrigode a besti bibe pa ca sujaba ropa, sobretude de tinta de tinter ondê que no tava moiá nôs caneta de ponta de ferre o pena de galinha. Mata-burrão tinha d’estode sempre pronte, mode na principe era cada desastre de tinta na ropa na hora de prendê fazê letra. Inda más c’aquel mede mode professor era rigrose na caligrafia, que tinha que ser prope estilose e bnitim, quê se non palmatora tava cantá! Hora más sabe de tempe d’Escola de Rei era quês interval c’aquês bonhe de mar gatchode na Praia de Bote, zona pruibide ondê Muchim de Faria, Pliça de Captania, tava fecá ta guitá nôs po ropa deboxe de pedra na hora de basse trá quel bon tchlufe na mar. Lá el tava tchegá log ta fazê gente moral e tava lembrá nôs cma bonhe na mar lá era proibide, sobretude que nôs era mnin e, se no fogaba, el é qu’era responsável. Chima tinha razon, té pa ptá tchuque, ma nôs tchlufe era más importante, assim consei de Chima tava entrá num uvide e sei na ote. Ma cma el tava conchê tude nôs, recode tava bai pa casa e tava tchegá primer, mode quel tchlufe proibide. Smeme assim, levode de vara, n’ote dia no tava torná bai quê quel intintaçon era más forte que nôs e no ca tava podê risisti! Escola era tmode a série e tude gente tava prendê dum manera o d’ote. Também, na vida d’Escola tinha sês sabe ma sês margose, moda tude cosa na vida, e pirraça ca tava faltaba também, na mei daquel espirte de mnin chei d’imaginaçon. Um ta lembrá dum vez que nôs Jack de Beta, qu’era um bocadim más bedje, ma grande que nôs tude e tava sentá na funde d’aula, tchegá convencê nôs tude na Escola cma Senhor Carvallho, professor, que tinha um broce de burracha (prótese), tinha el pirdide na Batalha d’Aljubarrota (que fui na séc.XIV) e que tude nôs, chei d’admiraçon, na nôs cabicinha de mnin creditá. Também tinha quês bzana d’Escola, moda Jack Filomena ma Anton Dionísio, que tava trabaiá bem, que quonde ês tava panhá zero erre na ditado sês glantaria era sei ta mostrá tude gente sês caderne. Inda por cima, quonde ês tava tchegá na casa, na tchã de Licrim, tude gente já sabia cma ês tinha panhode zero erre, quê ês tava corrê logue ba dzê Nhanha, sês avó, que cuitada ca sabia nem lê nem escrevê! Má pa ês era um galantaria e um prenda grande quonde Nhanha, tude contente, tava dzês: - Boa, nhas nitin… Bsote bem li, dexáme matá bsote uns cratchim. Malta d’Escola butzás logue que nome d’Anton ma Jack CRATCHIM! Tude nôs tinha ruspeite e mede de Sr. Carvalho mode quel stora de Jack, ma despôs, quonde no tava dá História de Portugal e que já no era ma grande, é que nô tava bem realizá tude aquês mintirinha de nôs amigue e herói Jack de Beta. Anton, té hoje em dia, quonde no lembrá dês stória gente ca ta podê fecá sem arri! Da tarde era quel Escola de Ti Fefa (Sr. Alfrede Brito), grande professor d’instruçon primária, ondê que nôs tude prendê dvera tcheu cosa: leitura, análise lógica e sintética, fracção, regra de três simples, naquel grand preparaçon daquel exame de quarta classe dum vez, que n’era brincadera! Ma também varinha de mantampa ma palmatória tava trabaiá sem brincadera. Era desafiu de taguada (tabuada), dada na mon entre nôs pa conta de professor. O certe é que ninguém ca morrê, nôs tude prendê e fecá que tcheu base, que sirvi pa tude nôs vida, té gora… Um grande UBRIGADO, TI FEFA e tude quês otes. Na fim, pa completá tude isse, tinha quês exame, qu’era quel momente de verdade na Escola Camões, Escola Nova e más. Exame era Prova Escrita e Prova Oral e despôs na fim tava bem quel parte más dure, qu’era quel leitura de pauta em voz alta de passaja d’exame, fete pa nosse continuo e grande amigue de sempre, José Tomaz. El tava somá lá naquel janela d’Escola e que voz olte e gritode, pa tude gente uvi, tava cumeçá: - Alfredo Justino Mota ………………… Aprovado (grite de ligria de malta) - Jorge Maria Nascimento……………… Distinto (grite!) - Alberto Maria das Dores …………….. Aprovado (grite) - João António Almeida …………….. Reprovado (tristeza. siguide dum oh…) Na fim, era uns t’arri, otes ta tchorá, ma na mei de tude aquile tava rancode c’aquel: - VIVA QUEL BOLE, VIVA!!! VIVA QUEL VIM, VIVA!!! VIVA SÊ PAI, VIVA!!! VIVA SÊ MÃE, VIVA!!! SENHOR CARVALHO, VIVA!!! MNINA CELESTE, VIVA!!! MNINA ILDA, VIVA!!! E assim, que tude mnin ta corrê pa casa de cumpanher num delîre sem fim, ta correba destança longe p’afronta, sima Rebera Bote, Montssussegue, Maderalzim, Tchã de Licrim té S. Pedre ma Salamança, tude Soncente tava vivê quel momente cum força de matá, pôs é OSSE DE TERRA e nôs tude nascê, no Otchal! Fui um épca rique, de força d’instruçon na nôs terra de Cabo Verde em que quem que prendê sube passá mensaja pa cumpanher. Interesse de prendê era tão grande na épca que té pescador tava descutí entre ês qual era más bom, s’era Nho BALTAS o Nho ROQUE? Zizim Figuera (José Figueira, Júnior) |
| |
APRENDAMOS COM A NOSSA HISTÓRIA.
Agradeço-te, sinceramente, Zizim, por mais este RECORDAR É VIVER.
Un d’kêj fídj d’Candin d’Alfândga, Cândido A. Paris.
Eu ainda sou desse tempo em que o ensino era levado mesmo a sério, em que os alunos eram orientados no sentido de ganharem consciência das suas responsabilidades no processo do ensino-aprendizagem e da importância do respeito, da honestidade e da saudável camaradagem para UMA VIDA, EM SOCIEDADE, HARMONIOSA. Os pais de então davam o devido valor a esses princípios e tinham a consciência do seu papel nesse processo, não se demitindo das respectivas responsabilidades. Quanto às autoridades, em geral, primavam-se pelo rigor, pela honestidade, pelo respeito e competência efectiva.
Outros tempos esses.
Como tudo mudou da Independência a esta parte.
A política subornou o ensino, perverteu-o, e é o que se vê.
Os bons princípios foram sendo gradualmente hostilizados em benefício do controlo do poder, e, através deste, da sociedade e dos cidadãos.
Confesso que nunca fui adepto dos castigos corporais, em muitos casos exagerados. O certo é que terão, em larga medida, funcionado. Continuo, entretanto, contrário aos mesmos.
Sempre fui daqueles que não precisaram ser forçados a estudar.
O segredo terá sido amar o saber, embora reconheça a influência positiva que minha Mãe terá tido, neste capítulo, sobre mim.
O facto do meu Pai ter sido um amante dos livros, principalmente, de carácter histórico e profissional, terão produzido seus efeitos benéficos.
BEM HAJA.
